KIDUNG JEMUAH KLIWON

KIDUNG JEMUAH KLIWON

Kalipur tembangmu, Nyai
Sadawaning wengi tangis
Tekamu lir ganda wangi
Ngancani nglarung kangenku hangridhu

Ratmaya maes janji, banjur cidra
Sukmaku kajiret lara branta
Tansah memala; tanpa turu tanpa kanca
Ilang hawa lan pepadhang
Peteng dhedhet, wuta dalan

Aku kapengin mulih
Nanging pedhut asmara ora gelem ngalih

Rasaku kranjingan
Kasirep endahing kasmaran

Sakabeh pituture dakgugu
Apa panjaluke, tekad praya dakmituhu
Mulat dahana jaluk jiwa raga
Kang tumbal awakku kobong dadi awu
Kanggo katresnanku

DEMANGAN BARU, 4 11 21
Dening Anik Susanti 

Komentar

Posting Komentar

Postingan populer dari blog ini

Nandhang Brangta

Gambar
NANDHANG BRANGTA Sadawaning Malioboro, kaya-kaya mlaku tanpa nyawa Ing sangandhap soroting wulan ndhadhari Sineksi lelakon iki Wewayangmu tan sumingkir Senadyan wengi sansaya lingsir Gandrung wuyung  Gumleyang kapang katerak angin Tansah sumedhot rasa ing batin Sarira kadhung tresna Mbukak sajembare kori ati Nanging slirane hamung reka-reka Ngumbar guyon, daktampa kejeron Anggonku nandhang brangta Nembang tangis sansaya deres Welas tanpa wates Langgeng, nadyan tanpa wales Ngayogyakarta, 15 Juni 2022 Dening Anik Susanti
Baca selengkapnya

AJA NINGGAL AKU

Gambar
AJA NINGGAL AKU Deresing udan wayah dalu Kadya santere banyu mili ing netraku Sajroning manah tansah kepanah Tan bisa inggat, hamung bisa dakrumat Dhuh, Kakang Abimanyu! Aja ninggal aku Senadyan tresna dadi dhuhkita Pait getir aku lila nerima Sasangkan paran, daktututi laku nira Nganti pegating nyawa DEMANGAN BARU, 4 11 21
Baca selengkapnya

TRESNAKU LUGU, HAMUNG NYEBUT JENENGMU

Gambar
Tresnaku Lugu, Hamung Nyebut Jenengmu Dhuh arum dalu sinebar wangi Ing lingsir wengi Ngelingake marang asma kang nyawiji Panjawabe wingi bakal tuhu mring janji Dakenteni, dakenteni ... Guritmu tansah njiret ati Nggebyur tutur Tan bisa dakwangsuli Aku hamung nyebut jenengmu Tresna, ora patut sulaya Nadyan kebak godha, nadyan mili tangis Ngindhit abote kapang kang ora uwis-uwis Dadya marga gung asmara Salawase sih sesandhingan  Yogyakarta, 26 3 22
Baca selengkapnya